Noyabrın 19-da bir neçə xəbər saytı nəhəng dəniz canlısına aid olduğu iddia edilən görüntülər paylaşıb. “Baku.ws”, “axar.az”, “hurriyyet.az”, “musavat.com”, “bakivaxti.az”, “avtosfer.az”, “xalqcebhesi.az”, “moderator.az” və digər saytlarda yayılan xəbərlərdə iddia edilir ki, nəhəng dəniz canlısı Yunanıstanın Egey dənizi sahillərində, dənizin Pylos qəsəbəsinə yaxın ərazisində görünüb.
Skrinşot “baku.ws” saytından götürülüb
“Şahidlərin sözlərinə görə, bu canlı nəhəng osminoq olub və o sahilə doğru irəliləməyə çalışıb. Balıqçı Yannis Papadopoulos həmin vaxt gördüklərini belə xatırlayıb: "Mən dənizə çıxmaq üzrə idim, suda böyük bir hərəkətlilik hiss etdim. Yaxınlaşdığımda, böyük bir osminoqun su səthində üzdüyünü gördüm. Ömrümdə belə bir şey görməmişdim". Şahidlərin sözlərinə görə osminoqun bir qolu təxminin 20 metr uzunluğunda olub. Rəsmilər yerli əhalini panikaya düşməməyə çağırıb”, - “baku.ws”in xəbərində belə deyilir.
Skrinşot “Bizim.media” saytının feysbuk səhifəsindən götürülüb
“Fakt Yoxla” iddianın doğru olub-olmadığını yoxlayıb.
Sözügedən kadrlar daha əvvəl süni intellektlə real olmayan müxtəlif canlılar hazırlayan “zap_ia” adlı “TikTok” hesabında paylaşılıb. Video həmin hesabda öncə noyabrın 11-də fonda musiqi ilə paylaşılıb. Hesab istifadəçisi həmin paylaşımda ona süni intellektlə foto və video hazırladığına görə “Collab_AI” adlı istifadəçiyə təşəkkür edib.
Skrinşot “zap_ia” adlı “TikTok” hesabından götürülüb
Eyni video noyabrın 14-də dəniz səsi ilə yenidən paylaşılıb. Azərbaycan mətbuatında yayılan görüntülər videonun bu versiyasıdır.
Qeyd edək ki, indiyə qədər tapılmış ən böyük osminoq 270 kiloqram və 9 metr uzunluğunda olub.
“Zap_ia” adlı “TikTok” hesabında süni intellekt texnologiyası ilə yaradılan digər videoları da görmək mümkündür.
Skrinşot “zap_ia” adlı “TikTok” hesabından götürülüb
Yeri gəlmişkən, Azərbaycan mətbuatında yayılan xəbərdə adı çəkilən balıqçı və onun açıqlamasını yunan və ingilis dillərində axtarışa versək də, heç bir nəticə əldə edilməyib.
“Fakt Yoxla”nın gəldiyi qənaətə görə, Yunanıstanda nəhəng dəniz canlısının göründüyü barədə xəbərlər saxtadır.
