Oktyabrın 27-də 20 minə yaxın izləyicisi olan “Alioglu” teleqram kanalı video paylaşaraq iddia edib ki, bir gün əvvəl xəstəxanaya yerləşdirildiyi barədə görüntülər yayan bloger ertəsi gün sağalıb.
“Qəzzadan olan "qalmaqallı bloger" dünən İDF (İsrail Müdafiə Qüvvələri nəzərdə tutulur - red.) hücumları nəticəsində "ağır yaralandığını" iddia edərək xəstəxanaya yerləşdirildiyi videolarını yükləsə də, bu gün möcüzəvi şəkildə tamamilə sağalıb”, - paylaşımda belə deyilir.
Skrinşot “Alioglu” Teleqram kanalından götürülüb
“Fakt Yoxla” iddianın doğru olub-olmadığını yoxlayıb.
Görüntülərdə solda duran şəxs toqquşma ilə bağlı Qəzzadan görüntülər paylaşan və instaqramda özünü musiqiçi kimi təqdim edən Saleh Əlcəfəravidir. O, həmin videonu oktyabrın 25-də paylaşıb. “Həyatımda ilk dəfə belə bir cinayətin şahidi oldum!! Gözümün qabağına 30-dan çox raket düşdü. Bütün bir ərazi məhv edildi”, - paylaşımda bildirilir.
Skrinşot Saleh Əlcəfəravinin instaqram hesabından götürülüb
Ancaq sağdakı videoda görünən şəxs Saleh Əlcəfəravi deyil. Videonun döyüşlərin başlamasından əvvəl, avqust ayında “TikTok”da paylaşıldığını görmək mümkündür.
Skrinşot “hamodahmdan1” adlı “TikTok” hesabından götürülüb
Beynəlxalq Həmrəylik Hərəkatı tərəfindən də fotosu paylaşılan şəxsin 16 yaşlı Məhəmməd Zendiq olduğu bildirilir.
Foto Beynəlxalq Həmrəylik Hərəkatının saytından götürülüb
Məlumata görə, Zendiq iyulun 24-də İsrail ordusunun Nur Şəms qaçqın düşərgəsinə hücumu zamanı ayaqlarını itirib. “Hamode.zandek” adlı “TikTok” hesabında sözügedən şəxsin xəstəxanadan çıxdıqdan sonra çəkilən videoları paylaşılıb.
“Fakt Yoxla”nın gəldiyi qənaətə görə, Qəzzada bir gün əvvəl yaralanan şəxsin ertəsi gün sağlam video paylaşması barədə görüntülər saxtadır.
