"Report.az" Fransada keçirilən 2024 Paralimpiya Oyunları ilə bağlı məqaləsində qeyd edir ki, Olimpiya Oyunlarının açılış mərasimi, Paralimpiya oyunlarının açılış mərasimindəki biabırçılıq göstərdi ki, tədbirin keçirildiyi ölkə sülh, dostluq, həmrəylik və ayrı-seçkiliyin bütün formalarına qarşı mübarizə prinsiplərindən uzaqdır.
“Fakt Yoxla” xəbəri təhlil etmək qərarına gəlib.
Paralimpiya Oyunları tarixən inklüzivliyi, müxtəlifliyi və Olimpiya Xartiyasının dəyərlərini təşviq edən bir platformadır. Paralimpiya Oyunları İkinci Dünya Müharibəsindən sonra onurğa beyni zədələri olan əsgərlərin reabilitasiyası üçün başladılıb və sonradan fiziki məhdudiyyətli idmançılara dünyaya öz bacarıqlarını nümayiş etdirməyə imkan verən qlobal bir tədbirə çevrilib.
Fransada keçirilən 2024 Paralimpiya Oyunları bu ənənəni davam etdirərək müxtəlifliyi və dözümlülüyü ehtiva edən açılış mərasimi ilə başladı. Müxtəlif etnik və mədəni qruplardan olan sənətçilərin çıxışları qlobal birliyi və sülhü təmsil edərkən 160-dan çox ölkədən gələn müxtəlif bacarıq və etnik mənşəyə malik idmançılar oyunlarda iştirak edərək tədbirin inklüziv xarakterini vurğuladılar. Çünki, Paralimpiya Oyunlarının mahiyyəti insanları bacarıqlarından asılı olmayaraq bir araya gətirmək və həmrəyliyi təşviq etməkdir.
Oyunlara hazırlıq zamanı Fransa tədbirin mümkün qədər inklüziv olması üçün infrastrukturun yaxşılaşdırılmasına böyük miqdarda investisiya qoyub. Məsələn, Parisdə ictimai nəqliyyat sisteminin yenilənməsi, pandus və liftlərin quraşdırılması, tarixi yerlərin fiziki məhdudiyyəti olan ziyarətçilər üçün uyğunlaşdırılması kimi işlər görülüb. Təşkilat komitəsi fiziki məhdudiyyətli insanların hüquqları üzrə işləyən qruplarla sıx əməkdaşlıq edərək şəhərin bütün idmançılar və tamaşaçılar üçün açıq və əlçatan olmasını təmin etdi.
Bundan əlavə, 2024 Paralimpiya Oyunları insan hüquqlarının, ayrı-seçkiliyə qarşı mübarizənin və bərabərliyin vacibliyini vurğulayan Olimpiya və Paralimpiya Xartiyasına uyğun olaraq keçirildi.
"Report.az" məqaləsində oyunlar zamanı baş vermiş “biabırçı hadisə”yə istinad edilsə də, bu iddianı dəstəkləyən hər hansı əhəmiyyətli dəlil yoxdur. Əksinə, Paralimpiya Oyunları beynəlxalq media qurumları və iştirak edən idmançılar tərəfindən həmrəyliyə görə təriflənib.
"Report.az"ın məqaləsi son dövrlərdə Azərbaycan mediasında artan anti-Fransa məzmunlu məqalələrin bir nümunəsidir. Bu tendensiya Azərbaycan və Fransa arasında gərginliyin artdığı bir dövrdə Fransa əleyhinə yönəlmiş daha geniş siyasi propaqandanın bir hissəsi kimi görünür.
“Fakt Yoxla”nın gəldiyi nəticəyə görə "Report.az"ın 2024-cü il Paralimpiya Oyunlarının sülh, dostluq, həmrəylik və ayrı-seçkiliyə qarşı mübarizə prinsiplərindən uzaq olduğu iddiası anti-qərb dezinformasiyasıdır.
