Feysbuk sosial şəbəbəkəsində hərbçiyə aid olduğu iddia edilən skeletin fotosu yayılıb.
“Müharibə çoxdan bitib, hamı qələbəni bayram edib. amma bu qərib əsgər unudulmuş qaldı, kim olduğu heç zaman bilinmədi”, - 800 dən çox istifadəçi tərəfindən reaksiya bildirilən paylaşımda belə deyilir.
Skrinşot Osman Eminov adlı feysbuk hesabından götürülüb
Şərh yazan bir çox istifadəçi fotonun real olduğunu düşünüb. Fotonu paylaşan istifadəçi şərhlərdə hərbçi skeletinin İkinci Dünya müharibəsindən qaldığını iddia edib.
Skrinşot Osman Eminov adlı feysbuk hesabından götürülüb
“Fakt Yoxla” iddianın doğru olub-olmadığını araşdırıb.
Fotoda kiçik təpə arxasında hərbi geyimin elementləri (papaq, ayaqqabı, çanta) olan şəxsin skeleti, skeletin yanında isə silah görünür.
Ancaq foto real deyil. Foto 2017-ci ildə Dilip Sarkar adlı müəllif tərəfindən hazırlanmış diorama (tarixi hadisə və ya təbiət mənzərəsini gerçək kimi göstərən maket) modelidir.
Sarkar həmin modeli “Military Modelling” jurnalında “Missing in Action – Rest in Peace?” başlıqlı məqaləsində təqdim edib. Modelin hazırlanmasında “Airfix” şirkətinin 1/6 ölçülü skeleti istifadə olunub.
Skrinşot “Military Modelling” jurnalından götürülüb (Jurnalın PDF versiyası)
Jurnal üçün başqa modellər də hazırlayan Sarkar məqalədə bu əsərlə müharibələrdə torpaq altında qalan milyonlarla insanın taleyinə diqqət çəkmək istədiyini bildirib.
Skrinşot müəllif Dilip Sarkarın feysbuk paylaşımından götürülüb
Qeyd edək ki, eyni foto daha əvvəl də müxtəlif iddialarla gündəmə gətirilib, bəzən Əfqanıstanda həlak olmuş rus əsgəri, bəzən Kipr əməliyyatında unudulmuş türk hərbçisi kimi təqdim edilib.
“Fakt Yoxla”nın gəldiyi qənaətə görə, hərbçi skeletinin həqiqi olması barədə xəbər saxtadır.
