100 mindən artıq izləyicisi olan “Operativ Məlumat Mərkəzi – OMM” adlı teleqram kanalı aşağıdakı fotonu paylaşaraq iddia edib ki, bu foto Ermənistan və Azərbaycan xarici işlər nazirlərinin mayın 2-də ABŞ-da keçirilən görüşü zamanı çəkilib.
Skrinşot “Operativ Məlumat Mərkəzi – OMM” teleqram kanalından götürülüb.
Analoji foto “Sputnik Azərbaycan” xəbər agentliyinə məxsus teleqram kanalında, “Herbi_Azerbaijan”, “isayevios” və digər kanallarda yayılıb.
Skrinşot “SputnikAz” adlı teleqram kanalından götürülüb.
Skrinşot “Herbi_Azerbaijan” adlı teleqram kanalından götürülüb.
Skrinşot “isayevios” adlı teleqram kanalından götürülüb.
“Faktyoxla” fotonun həqiqətən görüş zamanı çəkilib-çəkilmədiyini yoxlayıb.
1 May 2023-cü ildə ABŞ-da Azərbaycan və Ermənistan xarici işlər nazirləri arasında görüş keçirilib. “APA” və “Report” informasiya agentlikləri görüşlərin mayın 2-də də davam etdiyini bildirib. Bu xəbərin yayılmasından sonra 2 may tarixində sözügedən teleqram kanalları keçirilən görüş zamanı çəkildiyi iddia edilən fotonu yayıb.
Ancaq foto mayın 2-də keçirilən görüşə aid deyil. Ermənistan xarici işlər naziri Ararat Mirzoyan və Azərbaycan xarici işlər naziri Ceyhun Bayramovun əl sıxışdığı foto 2022-ci il noyabrın 8-də “Blair House”da (ABŞ) keçirilən görüşə aiddir.
Skrinşot “mfa.gov.az” saytından götürülüb.
Azərbaycan və Ermənistan xarici işlər nazirləri arasında 2023-cü il mayın 1-də başlayan görüş isə Corc Şultz adına Xarici İşlər üzrə Milli Tədris Mərkəzində keçirilir. Görüşdən çəkilən foto aşağıdadır:
Foto Azərbaycan Xarici İşlər Nazirliyinin “Twitter” səhifəsindən götürülüb.
“Fakt Yoxla”nın gəldiyi qənaətə görə, Ceyhun Bayramov və Ararat Mirzoyanın əl sıxışdığını göstərən fotonun 2023-cü il mayın 2-də keçirilən görüşə aid olması barədə fotolar saxtadır.
