Sentyabrın 6-da ABŞ Dövlət katibi Entoni Blinken Ukraynanın paytaxtı Kiyevə səfər edib. O, Ukrayna Prezidenti Volodimir Zelenski və xarici işlər naziri Dmitri Kuleba ilə görüşüb.
Səfərlə bağlı xəbərin yayılmasından sonra “İctimai TV” “YouTube” kanalı Blinkenin Kiyevdə "Patron" adlı itlə görüşdüyünü iddia edən video yayıb.
Skrinşot “İctimai TV”nin “YouTube” kanalından götürülüb
Oxşar videonu “musavat.com”, “axar.az”, “azvision”, “alioglu” teleqram kanalları da paylaşıb.
Skrinşot “musavat.com”un teleqram qrupundan götürülüb
“Fakt Yoxla”xəbərin doğru olub-olmadığını yoxlayıb.
“Patron” adlı it Ukraynada partlayıcıların zərərsizləşdirilməsində iştirak edir. O, dövlət mükafatlarına layiq görülüb və simvola çevrilib.
Ancaq Blinkenin “Patron”la görüşməsini əks etdirən video yeni deyil. Görüntülər ABŞ Dövlət katibinin ötən ilin sentyabrında Kiyevə səfəri zamanı çəkilib. Video 2022-ci ilin sentyabr ayında “ukraine.ua” adlı feysbuk səhifəsində paylaşılıb.
Skrinşot “ukraine.ua” adlı feysbuk səhifəsindən götürülüb.
“Fakt Yoxla”nın gəldiyi qənaətə görə, Blinkenin 2023-cü ilin 6 sentyabr tarixində Kiyevə səfəri zamanı “Patron” adlı itlə görüşməsi barədə xəbərlər saxtadır.
