2016-cı il 6 dekabr tarixində Azərbaycan Respublikası Prezidentinin Fərmanı ilə “Azərbaycan Respublikasının milli iqtisadiyyat perspektivi üzrə Strateji Yol Xəritəsi” təsdiq edilib.
Sənədin tədbirlər planı bölməsinin 4.4.1-ci bəndində qanunvericiliyin təkmilləşdirilməsi istiqamətində 2017-2020-ci illərdə Rəqabət Məcəlləsinin qəbul edilməsi vəd edilirdi:
“Azərbaycanda müstəqil fəaliyyət göstərən rəqabət orqanının yaradılması nəzərdən keçiriləcək və beynəlxalq təcrübəyə uyğun Rəqabət Məcəlləsi qəbul ediləcəkdir.”
“Fakt Yoxla” bu vədin yerinə yetirilib-yetirilmədiyini yoxlayıb.
Sənəddə bildirilir ki, rəqabət mühitinin təkmilləşdirilməsinin əsas icra göstəricisi “rəqabət məcəlləsinin qəbul edilməsi” olacaq.
Ancaq, Rəqabət Məcəlləsi bu günə qədər qəbul edilməyib. 2023-cü ilin mart ayının 16-da İqtisadiyyat Nazirliyi yanında Antiinhisar və İstehlak Bazarlarına Nəzarət Dövlət Xidmətinin rəisi Məmməd Abbasbəyli deyib ki, Rəqabət Məcəlləsinin təsdiqlənməsi son mərhələdədir.
Qeyd edək ki, Rəqabət Məcəlləsinin layihəsi adlı sənəd 2006-cı ildə də parlamentə daxil olub və bu barədə müzakirələr aparılıb. Qanun layihəsi 2 oxunuşdan keçsə də, 3-cü oxunuşa çıxarılmayıb.
“Fakt Yoxla”nın gəldiyi qənaətə görə vəd yerinə yetirilməyib.
