“Bütün dünya ölkələrində, o cümlədən Azərbaycanda 2020-ci il iqtisadi tənəzzül ili olub”.
Prezident İlham Əliyev yanvarın 18-də Sumqayıt Kimya Sənaye Parkında təməlqoyma və açılış mərasimlərindən sonra AZTV-yə müsahibəsində belə deyib.
“Amma bizdə tənəzzül cəmi 4,3 faiz olmuşdur. İnkişaf etmiş bəzi ölkələrdə bu daha böyük rəqəmlərlə ölçülür”, - deyə o əlavə edib.
“Fakt Yoxla” İlham Əliyevin bu iddiasının doğru olub-olmadığını yoxlayıb.
Ölkə prezidenti Azərbaycan iqtisadiyyatının 2020-ci ildə 4.3% kiçilməsi faktını rəsmi statistikaya istinad edərək səsləndirib.
İnkişaf etmiş 36 ölkəni birləşdirən İqtisadi Əməkdaşlıq və İnkişaf Təşkilatına (OECD) daxil olan ölkələr üzrə 2020-ci ildə iqtisadi daralma orta hesabla -4.2% olub.
2020-ci ildə dünyanın ən nəhəng ölkəsi olan ABŞ və Çində iqtisadi artım baxımından fərqli nəticələr qeydə alınıb.
Pandemiyanın təsiri üzündən ABŞ iqtisadiyyatı 2.3% kiçildiyi halda, Çin iqtisadiyyatı eyni həcmdə böyüyüb.
Dünya Bankının statistikasına əsasən iqtisadi cəhətdən inkişaf etmiş, aparıcı iqtisadiyyata sahib və artıq 2020-ci ilin yekunlarına dair makroiqtisadi göstəricilərini açıqlamış 15 ölkənin iqtisadi artımı aşağıdakı kimidir:
Dünya Bankının gəlir təsnifatında yüksək inkişaf etmiş ölkə statusunda olan dövlətlərin 2020-ci ildə iqtisadiyyatının araşdırması göstərir ki, onların xeyli hissəsində azalma 5% və daha yüksək olub. Beləliklə, Azərbaycan iqtisadiyyatı yüksək inkişaf etmiş dövlətlərlə müqayisədə daha az iqtisadi geriləmə yaşayıb. Müqayisəyə cəlb edilmiş 15 aparıcı ölkə içərisində Azərbaycan 6-ci yaxşı nəticəni göstərib.
“Fakt Yoxla"nın gəldiyi nəticəyə görə, İlham Əliyevin iddiası doğrudur.
