Azərbaycan Respublikası Prezidentinin 29 dekabr 2012-ci il tarixli fərmanı ilə “Azərbaycan 2020: gələcəyə baxış” İnkişaf Konsepsiyası təsdiq olunmuşdu.
Sənəddə qeyd edilir ki, konsepsiya 2020-ci ilədək olan dövr üçün ölkənin perspektiv inkişafının hədəf və istiqamətlərini müəyyənləşdirmək və onların reallaşmasını təmin etmək məqsədi ilə qəbul edilib. Bu sənəddə hökümət 2020-ci ilədək bir çox sosial-iqtisadi istiqamətlərdə hədəflərini açıqlayıb ki, adambaşına düşən ümumi daxili məhsul (ÜDM) bunlardan biridir. Konsepsiyada qeyd edilir ki, “nəzərdə tutulmuş tədbirlərin icrası nəticəsində dövrün sonuna ölkədə adambaşına düşən ÜDM-in həcmi iki dəfə artaraq 13 000 ABŞ dollarına çatacaq”.
“Fakt Yoxla” hökümətin 2020-ci ilədək ölkədə adambaşına düşən ÜDM göstəricisinin 13 min dollar olacağı ilə bağlı vədini həyata keçirib-keçirə bilmədiyini araşdırıb.
Cədvəl: 2012-2022-ci illərdə Azərbaycanda qeydə alınan adambaşına düşən ÜDM göstəricisi
Cədvəldən göründüyü kimi, 2020-ci ildə Azərbaycanda adambaşına düşən ÜDM göstəricisi dollar ifadəsində 4 281 dollara bərabər olub. Bu isə, hökümətin vəd etdiyi göstəricidən (13 min dollar) təxminən üç dəfə aşağı göstəricidir. Proqramın qəbul edildiyi 2012-ci ildə eyni göstərici 7 594 dollara bərabər idi. Yəni, 2012-2020-ci illər arasında adambaşına düşən ÜDM göstəricisi dollar ifadəsində 44% geriləyib.
“Fakt Yoxla”nın araşdırmasına görə, hökümət 2020-ci ilədək ölkədə adambaşına düşən ÜDM göstəricisinin 13 min dollara çatacağı ilə bağlı vədi yerinə yetirməyib.