“Bu ilin sonuna qədər bütün məktəblərin internetlə əhatə olunması nəzərdə tutulur”.
Bunu hazırda Rəqəmsal İnkişaf və Nəqliyyat Nazirliyi, həmin vaxt isə Rabitə və İnformasiya Texnologiyaları Nazirliyi adlanan nazirliyin mətbuat xidməti 2013-cü ildə mətbuata açıqlamasında bildirmişdi.
“Fakt Yoxla” nazirliyin bu vədini yerinə yetirib-yetirmədiyini araşdırıb.
2012-ci ildə ölkədə internetə çıxışı olan məktəblərin bütün məktəblərdə payı respublika üzrə 48,3%-ə bərabər idi. (“Dövlət Statistika Komitəsi”, Dayanıqlı İnkişaf Məqsədləri, 2018, səh.65)
Cədvəl: 2013-2021-ci illərdə Azərbaycanda məktəblərin internetlə təmin olunma göstəricisi
Dövlət Statistika Komitəsinin Azərbaycanda məktəblərin internetlə təmin edilmə göstəricisi ilə bağlı açıqladığı rəqəmlərdən aydın olur ki, 2013-cü ildə Azərbaycanda məktəblərin hamısı internetlə təmin edilə bilməyib. Həmin ilin sonuna müvafiq göstərici 49.4 faizə bərabər olub. Bu göstəricinin ən yüksək həddi 2021-ci ildə qeydə alınıb ki, o da 69,1 faizə bərabərdir.
2021-ci ildə ölkədə 4426 ümumtəhsil məktəbin olduğunu nəzərə alsaq, bu o deməkdir ki, ölkədəki məktəblərin 3058-i internetlə təmin edilib. 1367 məktəbdə isə internet yoxdur.
“Fakt Yoxla”nın araşdırmasına görə, Rabitə və İnformasiya Texnologiyaları Nazirliyi vədi yerinə yetirməyib.