ABŞ dollarının üzərində olan simvollar hər zaman konspirasiya nəzəriyyələrinin məşhur mövzusu olub. Konspirasiya nəzəriyyələri daha çox dini-siyasi elementlər üzərində cəmlənir.
Bununla bağlı növbəti iddia “Milli Fədailər Hərəkatı”nın feysbuk səhifəsində dərc olunub.
Yanvarın 12-də paylaşılan yazıda əskinasın ilk səlib yürüşünü əks etdirdiyi qeyd edilib:
“ABŞ 1 dolların ... arxa üzündə isə ... Roma rəqəmi ilə 1099-cu il göstərən İslam dünyasına ilk xaçlı xristian səfəri zamanı yəhudilərin Fələstin dövlətinin Qüds şəhərinin Süleyman Məbədi göstərən işarə qeyd olunub”.
“Fakt Yoxla” məlumatların doğru olub-olmadığını təhlil edib.
Mənbə: “Milli Fədailər Hərəkatı” feysbuk səhifəsi
Postda iddia edilir ki, Roma rəqəmləri ilə təqdim edilmiş “1099-cu il” müsəlmanların üzərinə ilk xaç yürüşünün tarixini göstərir. Əskinazın arxa üzündə həqiqətən də Roma rəqəmləri ilə bir “ədəd” təsvir edilib. Piramidanın alt hissəsinə nəzər saldıqda bu ədədi görmək olur.
Mənbə: “The Hill” qəzeti
Əskinasın arxa tərəfində qeyd olunan "MDCCLXXVI" detalı piramidanın alt hissəsində yerləşir. Ancaq bu Roma rəqəmləri ilə 1099-a yox, 1776-ya bərabərdir. 1776-cı il isə ABŞ-ın Müstəqillik Bəyannaməsinin qəbul edildiyi ili təmsil edir. Roma rəqəmləri ilə ifadə olunan tarixin Səlib yürüşlərinə və 1099-cu ili əks etdirdiyi fərziyyəsi əsassızdır.
“Fakt Yoxla”nın gəldiyi qənaətə görə, xəbər yanlışdır.
