“TV Musavat” Youtube kanalında yayımlanan “Gərgin Debat” proqramında (dəqiqə 55) “Ağ Partiya”nın sədri Tural Abbaslı iddia edib ki, Norveç Neft Fondu ilə Azərbaycan Respublikası Dövlət Neft Fondunun yaranması arasında 1 il fərq var. O bu iddianı yanlış idarəetmənin nəticəsində Azərbaycan ilə digər dövlətlərin iqtisadiyyatında yaranan fərqləri göstərərkən edib.
"Fakt Yoxla" iddianın doğru olub-olmadığını yoxlayıb.
29 dekabr 1999-cu il tarixində Azərbaycan Respublikası Prezidentinin 240 nömrəli Fərmanı ilə Azərbaycan Respublikası Dövlət Neft Fondu (ARDNF) təsis edilib. Norveçdəki müvafiq qurumun təsisi isə 1990-cı ildə baş verib və o vaxtkı adı ilə Hökumət Neft Fondu adlanırdı. 2006-cı ildən isə həmin qurumun adı dəyişdirilib Norveç Pensiya Fondu adlandırılıb.
Müqayisə üçün, 2024-cü ilin sonuna olan Azərbaycan Dövlət Neft Fondunun aktivləri təxminən 60 milyard dollar, Norveç Pensiya Fondunun aktivlərinin dəyəri isə təxminən 1 trilyon 739 milyard dollar olub.
“Fakt Yoxla”nın gəldiyi nəticəyə görə, “Ağ Partiya”nın sədri Tural Abbaslının səsləndirdiyi iddia yanlışdır.
