UEFA “Qarabağ” Futbol Klubunun Azərbaycan-Ermənistan sərhədindəki döyüşlərdə şəhid olan azərbaycanlı hərbçilərin xatirəsinin 1 dəqiqəlik sükutla yad edilməsi müraciətinə mənfi cavab verib.
“Bizə UEFA-dan cavab gəldi ki, narahatlığınızı başa düşür, anlayışla qarşılayırıq. Lakin bu məsələ futbolla bağlı olmadığı üçün icazə verə bilmərik”, – deyə “Qarabağ”ın mətbuat xidmətinin rəhbəri Gündüz Abbaszadə bildirib.
“Fakt Yoxla” UEFA-nın (Avropa Futbol Assosiasiyaları Birliyi) bu qərarının onun son illərdə formalaşan təcrübəsinə uyğun olub-olmadığını araşdırıb.
Çempionlar Liqası və Avropa Liqası kimi qitənin ən uğurlu futbol klublarının qatıldığı yarışların təşkilatçılığını həyata keçirən UEFA bu açıqlamanı “Qarabağ”la “Nant” arasında Avropa Liqasının qrup mərhələsinin II turunun Bakıda keçirilən oyunundan əvvəl verib.
Bu oyundan bir neçə gün öncə Azərbaycan-Ermənistan arasında başlayan döyüşlər 71 hərbçinin həyatını itirməsilə nəticələnmişdi.
Avropada idman və futbol oyunlarının keçirilməsi zamanı təhlükəsizlik qaydalarını tənzimləyən normativ-hüquqi sənədlər arasında zorakılığın və xuliqanlığın qarşısının alınmasına yönəlik bir sıra sənədlər var.
Onların arasında Avropa Şurasının 1985-ci il tarixli “İdman tədbirləri və xüsusilə futbol oyunları zamanı azərkeşlər tərəfindən zorakılığın və xuliqanlığın qarşısının alınması haqqında” Avropa Konvensiyası və onun təkmilləşdirilməsinə yönəlmiş, tənzimlənən münasibətlər spektrini genişləndirən 2016-cı il tarixli “Futbol oyunları və digər idman tədbirləri zamanı təhlükəsizlik, mühafizə və xidmət məsələlərinə dair vahid yanaşma haqqında” Konvensiya xüsusi yer tutur. Bu konvensiyalarda 1 dəqiqəlik sükutun keçirilməsi standartları barədə məlumata rast gəlinmir.
Ağdamın “Qarabağ” FK-nın çıxış etdiyi UEFA Avropa Liqasının keçirilməsi qaydalarının əsasını UEFA Avropa Liqasının Qaydaları təşkil edir. Həmin qaydalarla yarışmanın sistemi, oyunların keçirilməsi və s. məsələlər tənzimlənir. Burada da 1 dəqiqəlik sükutun keçirilməsini tənzimləyən hər hansı müddəaya yer verilməyib. Bu isə onu deməyə əsas yaradır ki, anımla bağlı qərarlar UEFA tərəfindən vahid standarta əsasən qəbul edilmir.
UEFA son illər Dieqo Maradona, Davide Astori və Xose Antonio Reyesin vəfatı ilə bağlı 1 dəqiqəlik sükutun elan edilməsinə razılıq verib. “Qarabağ”ın müraciətinin “futbol ilə bağlı olmaması” ilə əsaslandıran UEFA 2011-ci ildə Yaponiyada baş vermiş zəlzələ və sunami nəticəsində həyatlarını itirmiş şəxslərin, 2016-ci ildə Nitsa şəhərində baş vermiş terror qurbanlarının, 2020-ci ildə koronavirus səbəbindən həyatlarını itirənlərin, eləcə də “Qarabağ”- “Nant” oyunundan bir həftə əvvəl vəfat edən Böyük Britaniya kraliçası İkinci Yelizavetanın xatirəsinin yad edilməsi məqsədilə 1 dəqiqəlik sükut elan edilib.
Dünyanın əksər siyasi güc mərkəzlərinin Ermənistan-Azərbaycan sərhəddində baş vermiş toqquşmanı gündəmlərinə daxil etməsi bu məsələnin də qlobal mahiyyət daşıdığını təsdiq edir. Belə ki, BMT Təhlükəsizlik Şurası bu toqquşmalara görə fövqaladə toplantı keçirb, ABŞ, Fransa, Rusiya rəsmiləri ya regiona səfər edib, ya da insan itkiləri ilə bağlı tərəflərə başsağlığı veriblər.
Beləliklə, UEFA əvvəlki illərdə futbolla bağlı olmayan hadisələrin anım sükutuna müsbət cavab verib. Futbol yarışı normalarıyla bağlı sənədlərdə anım sükutu ilə bağlı müddəanın olmaması UEFA-nın bu qərarları şəxsi mülahizə əsasında verdiyinə dair qənaət yaradır.
“Fakt Yoxla”nın gəldiyi nəticəyə görə, UEFA-nın “Qarabağ” Futbol Klubuna verdiyi cavab onun anım sükutu ilə bağlı əvvəlki təcrübələrinə uyğun gəlmir.