“Ərdoğanın vasitəçiliyi ilə HƏMAS tərəfindən Qəzzada əsir götürülən 3 İsrail vətəndaşı azad edilərək İsrail tərəfinə geri qaytarılıb”
Bunu “Telegram” sosial şəbəkəsində 65 mindən çox izləyicisi olan ŞEDEVR+ kanalı Əl-Cəzirə xəbər agentliyinə istinadən bildirib. Paylaşımı 18 minə yaxın insan görüb.
“Fakt Yoxla” bu xəbərin doğru olub-olmadığını yoxlayıb.
Skrinşot ŞEDEVR + Telegram kanalı
Fələstinli silahlı qruplaşmalarla İsrail arasında oktyabrın 7-dən başlayan müharibədən sonra HƏMAS 150-ə yaxın israillini əsir götürüb. Qruplaşma İsrail həbsxanalarında saxlanılan 4500-ə yaxın fələstinlinin azad edilməsini tələb edir. HƏMAS-ın hücumundan sonra İsrail Qəzzanı havadan raketlərlə və hərbi təyyarələrlə bombalamağa başlayıb. BMT-nin Fələstin Qaçqın Agentliyinin məlumatına görə, Qəzzada yaşayan 250 mindən artıq sakin İsrail bombardmanı nəticəsində evini itirib. İsrail tərəfindən ölənlərin sayı 1300-ü, ölən fələstinli sivillərin sayı isə 1100-ü keçib. Ölən və yaralananların sayı artmaqdadır.
HƏMAS-ın silahlı qanadı olan Qəssam Briqadası əsirlikdə saxlanılan 1 qadın və 2 uşağın azadlığa buraxılmasını əks etdirən video yayıb. Videogörüntü bazar ertəsi (11 oktyabr) Əl-Cəzirə telekanalı tərəfindən də yayılıb. Lakin əsirlərin Türkiyə Prezidentinin vasitəçiliyi ilə azad edilməsi nə Əl-Cəzirə, nə də digər media orqanlarının xəbərlərində qeyd olunub.
“Fakt Yoxla”nın gəldiyi nəticəyə görə, israilli əsirlərin Türkiyə Prezidenti Rəcəb Tayyib Ərdoğanın vasitəçiliyi ilə azadlığa buraxılması xəbəri saxtadır.