Dərman vasitələri üzrə Avropa Agentliyi (EMA) Rusiya istehsalı olan “Sputnik V”-nin İttifaq ərazisində qeydiyyatdan keçməsi üçün imkan yaradıb. Bu preparat üzrə elmi məsləhətləşmələr başa çatıb.
“Sputnik Azərbaycan” saytı 9 fevral 2021-ci ildə ”RİA Novosti”yə istinadən belə xəbər verib.
“Fakt Yoxla” xəbərin doğru olub-olmadığını yoxlayıb.
Dərman vasitələri üzrə Avropa Agentliyi (EMA) Avropa İttifaqı daxilində dərman vasitələrinin satışı üçün edilən müraciətlərin elmi qiymətləndirilməsini aparan qurumdur.
EMA “Sputnik V” peyvəndinin qeydiyyatı ilə bağlı 10 fevral 2021-ci ildə açıqlama yayıb. Açıqlamada deyilir ki, iddiaların əksinə, qurum hələ ki Rusiyada Gamaleya Milli Epidemiologiya və Mikrobiologiya Mərkəzi tərəfindən hazırlanmış “Sputnik V” peyvəndi (Gam-COVID-Vac) ilə bağlı dövri baxış və marketinq icazəsi üçün müraciət almayıb.
Vaksini inkişaf etdirən şəxslər EMA-dan elmi məsləhətlər alıb, agentlik isə öz növbəsində onları ən son qaydalarla bağlı məlumatlandırıb. Agentliyin şəffaflıq siyasətinə əsasən, qurumdan haqqında elmi məsləhətlər alınan dərman və vaksinlərin siyahısı dərc edilir. Siyahıda dərmanların hansı fazada olduğu da göstərilir. “Sputnik V” vaksini də bu səbəbdən həmin siyahıya daxil edilib.
EMA növbəti addımları izləmək üçün həmin şirkətlə daimi əlaqədədir. Adətən istisna hallarda belə olur. Pandemiyanın yaratdığı vəziyyətə əsasən dialoqlar aparılır ki, vaksin hazır olan kimi agentlik ona qiymət verə bilsin.
Hazırda qiymətləndirmə mərhələsində olan vaksinlərin də siyahısı agentliyin veb səhifəsində mövcuddur. Bu siyahıda isə “Sputnik V”-nin adı yoxdur. Bu isə o deməkdir ki, agentliyin peyvəndlə bağlı qiymətləndirməsi mövcud deyil, ümumiyyətlə isə, qurum belə müraciət almayıb.
“Fakt Yoxla”nın gəldiyi nəticəyə görə, xəbər saxtadır.
