Milli Məclisin deputatı Əlibala Məhərrəmzadə “olke.az” saytına açıqlamasında deyib ki, Çin əhali sayına görə dünyada 1-ci, iqtisadiyyatın həcminə görə 2-ci yerdədir. O bu iddianı hökumətin uğurlu xarici siyasəti və Çinlə münasibətləri ilə bağlı danışarkən bildirib.
"Fakt Yoxla" Çinin əhali sayına görə dünyada birinci olub-olmadığını yoxlayıb.
Çin uzun illər əhali sayına görə dünyada birinci yerdə olsa da, son onilliklərdə əhalinin artım tempi azalıb və 2021-ci ildən etibarən Çində əhalinin sayı da azalmağa başlayıb. 2023-cü ildə Hindistanın əhali sayı Çini ötüb və həmin ildən etibarən əhali sayına görə 1-ci olub. 2025-ci ilə olan statistikalara görə, Hindistan əhalisi təxminən 1 milyard 463 milyon, Çin əhalisi isə təxminən 1 milyard 416 milyon nəfərdir:
Mənbə: Statista
Beləliklə, 2023-cü ildən etibarən Çin əhalinin sayına görə liderliyi Hindistana verib.
“Fakt Yoxla”nın gəldiyi nəticəyə görə, deputat Əlibala Məhərrəmzadənin iddiası yanlışdır.
