Milli Məclisin deputatı Vüqar İskəndərov (YAP) deyib ki, Azərbaycan Xalq Cəhbəsi Partiyasının (AXCP) sentyabrın 30-da təşkil etdiyi etiraz aksiyasına partiya sədri Əli Kərimli də daxil olmaqla rəhbərlikdə təmsil olunan şəxslərin heç biri gəlməyib.
“Fakt Yoxla” bu iddianın doğru olub-olmadığını yoxlayıb.
Partiyanın rəhbərliyində təmsil olunan şəxslər və fəallar dedikdə partiya sədri, sədr müavini, Rəyasət Heyətinin üzvləri, komitə və rayon şöbələrinin rəhbərləri başa düşülür.
AXCP-nin parlamentin qarşısında təşkil etdiyi aksiyanın əsas məqsədi “Siyasi partiyalar haqqında” yeni qanun layihəsinə etiraz olub. Həm partiyanın Rəyasət Heyətinin üzvü, həm də aksiyanın təşkilatçılarından olan Vahid Məhərrəmli siyasi məhbuslara azadlıq, azad seçki, demokratik dəyişikliklər və sərhədlərin açılması kimi məsələlərin də səsləndirəcəkləri tələblər arasında olacağını bildirmişdi.
“Abzas media”nın yazdığına görə, aksiyadan əvvəl partiyanın rəhbər şəxslərinin və fəalların yaşadıqları evlərinin qarşısında polis nəzarəti altında olub. Məhz buna görə də, onların bir qismi aksiyanın planlaşdırıldığı yerə çatmadan saxlanılıblar.
AXCP-nin də təmsil olunduğu müxalif Milli Şura blokunun oktyabrın 3-də yaydığı bəyanatda aksiyada saxlanılan 177 nəfərin siyahısı dərc edilib. Onlar arasında partiya rəhbərliyində təmsil olunan şəxslər və fəallar da olub:
Seymur Həzi - AXCP sədrinin müavini
Nurəddin Məmmədli - AXCP Ali Məclisinin sədri
Bəxtiyar İmanov - AXCP Rəyasət Heyətinin üzvü
Saqif Qurbanov - AXCP Rəyasət Heyətinin üzvü
Vahid Məhərrəmli- AXCP Rəyasət Heyətinin üzvü
Faiq Nağıyev – AXCP Xətai rayon şöbəsinin sədri
Babək Həsənov – AXCP Nərimanov rayon şöbəsinin sədri
Əlizamin Salayev – AXCP Səlyan rayon şöbəsinin sədri
İsmayıllı Səməd – AXCP İsmayıllı rayon şöbəsinin sədri
Füzuli Qəhrəmanlı - AXCP Beyləqan rayon şöbəsinin sədri
Səttar Şahlarov – AXCP Sabirabad rayon şöbəsinin sədri
Ramid Nağıyev – AXCP Binəqədi rayon şöbəsinin sədri
Hüseyn İbrahimli – AXCP Naxçıvan MR KM-in sədri
Cəlil Hüseynli – AXCP Yasamal rayon şöbəsinin sədri
Kamal Heydərli – AXCP Hacıqabul rayon şöbəsinin sədri
Mehriban Hüseyinli – AXCP Xəzər rayon şöbəsinin sədri
Bəxtiyar Yusubov – AXCP Gəncə rayon şöbəsinin sədri
Qəşəm Əliyev – AXCP Ağsu rayon şöbəsinin sədri
Yaşar Məmmədov – AXCP Oğuz rayon şöbəsinin sədri
Əli Abdullayev – AXCP Şəki şöbəsinin sədri
Beləliklə, AXCP sədri Əli Kərimli sentyabrın 30-da təşkil olunan mitinqdə iştirak etməyib. Sıravi üzvlərlə yanaşı, partiyanın rəhbərliyində təmsil olunan şəxslər və fəalların bir qismi aksiya yerinə çatmamış saxlanılaraq polis bölmələrinə aparılıblar. Onlar bir müddət sonra sərbəst buraxılıblar.
“Fakt Yoxla”nın gəldiyi nəticəyə görə, Vüqar İskəndərovun iddiası əsasən yanlışdır.
