2024-cü ilin dekabrın 24-də “axar.az” saytının 34 minə yaxın izləyicisi olan teleqram kanalı Misirdə yeni keçirilən etiraz aksiyalarına aid olduğu iddia edilən görüntülər paylaşıb.
Skrinşot “axar.az” saytının teleqram kanalından götürülüb.
Eyni video “Baku.Tv”də, “baku.ws” saytının instaqram səhifəsində və bir sıra kiçik teleqram kanallarında yayılıb.
Skrinşot “Baku.Tv”nin saytından götürülüb.
“Yüzlərlə insan küçələrə çıxaraq Prezident Əbdülfəttah əs-Sisinin idarəçiliyinə qarşı narazılığını ifadə edir. Etirazların əsas səbəbləri arasında iqtisadi vəziyyətin ağırlaşması, yüksək korrupsiya səviyyəsi və vətəndaş azadlıqlarının məhdudlaşdırılması göstərilir”, - “Baku.Tv”nin xəbərində belə deyilir.
“Fakt Yoxla” iddianın doğru olub-olmadığını yoxlayıb.
Birinci video yeni deyil. Görüntülər 2019-cu ildə “Ahmed yousef” adlı yutub kanalına yerləşdirilib. Qeyd edilir ki, etirazçılar Misirin paytaxtı Qahirənin şimalında, Damietta şəhərinin mərkəzində, Saa meydanında Sisinin böyük plakatını yıxıblar.
Skrinşot “Ahmed yousef” adlı yutub kanalından götürülüb.
Həmin vaxt “Reuters” agentliyi bildirib ki, Qahirədə və digər şəhərlərdə bir neçə yüz insan küçələrə çıxaraq “Sisi, get!” qışqırıb, korrupsiyaya və prezidentin iqtisadi siyasətinə etiraz edib.
Sisinin plakatının cırıldığı ikinci video da bundan əvvəl 2019-cu ildə sosial mediada ərəbdilli istifadəçilər tərəfindən paylaşılıb.
Skrinşot “Akhbartaiz” feysbuk səhifəsindən götürülüb.
Üçüncü video 2019-cu ildə “X” platformasında, sonuncu video isə yutubda “Ayham Tube” adlı kanalda paylaşılıb.
“Fakt Yoxla”nın gəldiyi qənaətə görə, görüntülərin 2024-ci ildə Misirdə çəkilməsi barədə xəbərlər saxtadır.
