Təbriz şəhərini təmsil edən “Traktor” futbol klubu mayın 2-də Qəzvin şəhərində “Şəms Azar” komandasını məğlub edərək ilk dəfə İran Fars Körfəzi Peşəkar Liqasının çempionu olub.
“Traktor”un qələbəsindən sonra “oxu.az”ın 40 mindən çox, “Baku TV”nin 32 mindən çox izləyicisi olan teleqram kanalı İran Prezidenti Məsud Pezeşkianın fotosunu paylaşaraq qeyd edib ki, Prezident qələbəni qeyd edib.
Skrinşot “oxu.az”ın teleqram kanalından götürülüb
“İran Prezidenti Məsud Pezeşkian ailəsi ilə birgə “Traktor”un çempionluğunu qeyd ediblər”, - “oxu.az”ın paylaşımında belə deyilir.
Eyni foto on minlərlə izləyicisi olan “axar.az”, “Operativ Məlumat Mərkəzi”, “Şəbəkə”, “musavat.com”, “Alioglu” və digər teleqram kanallarında, həmçinin “musavat.com”, “moderator.az” saytlarında, “teleqraf.com” saytının instaqram və feysbuk səhifələrində geniş yayılıb.
Skrinşot “teleqraf.com” saytının feysbuk səhifəsindən götürülüb.
“Fakt Yoxla” xəbərin doğru olub-olmadığını yoxlayıb.
Fotoda Pezeşkian ailəsi ilə birlikdə görünür və masanın üzərində “Traktor” klubunun loqosu olan tort var. Ancaq foto yeni deyil. Araşdırma zamanı məlum olub ki, fotonu 2022-ci ildə Pezeşkianın oğlu Mehdi Pezeşkian özünün instaqram hesabında paylaşıb.
Skrinşot Mehdi Pezeşkianın instaqram səhifəsindən götürülüb
Paylaşımdan məlum olur ki, görüntü Pezeşkianın nəvəsinin ad günündə çəkilib.
“Fakt Yoxla”nın gəldiyi qənaətə görə, fotonun Pezeşkianın “Traktor”un qələbəsini qeyd etməsinə aid olması barədə xəbərlər saxtadır.
